嬰幼兒一般大約喺六至七個月大嘅時候開始出牙仔，而出牙對BB嘅睡眠影響係因人而異，有啲BB唔會因為出牙而影響睡眠質素，甚至喺出牙期間會比平時瞓得多，但係亦有好多BB係出牙期間會瞓得好差，半夜亦成日扎醒。
如果BB出緊牙仔，有機會有以下症狀：
經常流口水
拉扯耳朵
牙肉腫脹
成日放野入口咬
情緒欠佳
食欲不振
有啲BB出牙期間可能會發燒或者肚瀉，但係要記得出牙本身係唔會令BB發燒，只係因為佢哋出牙期間好鍾意咬野，所以增加細菌感染嘅機會。
出牙會對BB嘅睡眠造成影響，源於牙齒喺突破出牙齦時，會為BB帶嚟不適或痛楚。呢啲唔舒服嘅感覺往往令到BB瞓覺時經常扎醒，唔能夠安睡，甚至大喊求救。即使係一直有良好睡眠習慣嘅BB，半夜都有機會因為出牙唔舒服而扎醒，但如果BB一直都瞓得好，出牙對佢哋睡眠嘅影響相對會較細。
出牙仔可能會令BB瞓得差咗，但每次出牙對睡眠嘅影響一般只會持續幾日至一星期（除非巧合地BB同一時間出緊好多隻牙，或者牙接牙咁出）。
聽日會再出post講吓點樣可以減低BB喺出牙期間嘅不適☺️ 如果爸爸媽媽想知道多啲BB出牙嘅時間表，可以參考以下網站👇
Comentários