【固定嘅就寢時間】

你嘅小朋友係咪每日都有大致固定嘅就寢時間？定係就寢時間會有前後幾個鐘嘅差距？

有時候我哋可能會因為要外出食飯，或者參與同親戚朋友嘅聚會而遲咗返屋企，令小朋友嘅就寢時間都比平時遲。如果只係間中出現呢個情況，對小朋友嘅睡眠唔會有太大影響，但係畢竟小朋友夜咗瞓，晚間嘅睡眠時數未必足夠，之後一兩日可能都會因為瞓唔夠而心情唔靚，容易「扭計」，但只要小朋友之後幾日瞓返足夠，情況好快就會改善。

不過，如果小朋友嘅就寢時間係非常浮動，有時夜晚八點瞓，有時十點，甚至十一點幾先瞓，問題就會慢慢浮現 😖 英國嘅千禧世代研究 (Millennium Cohort Study)發現，如果小朋友經常都有浮動嘅就寢時間，佢哋比起有固定就寢時間嘅小朋友，較容易出現行為上嘅問題，包括過分活躍、難以專注、容易出現情緒低落等。

當中最大嘅原因係當小朋友經常有浮動嘅就寢時間，意味着佢哋夜晚嘅睡眠時數唔足夠。小朋友經常瞓少咗，長期休息不足難免就會積落好多「睡眠債」，令佢哋經常覺得好攰、好煩躁，容易發脾氣😫

長期唔夠休息，令身體不斷釋出好多壓力荷爾蒙，小朋友即使瞓落床亦好難瞓着，變相越來越遲瞓... 當呢個情況一直持續，就會形成惡性循環。

其實小朋友由出世開始都好鍾意有規律嘅生活，因為規律能夠讓佢哋預知之後會發生咩事，從而提升佢哋嘅安全感，令佢哋更輕鬆自在去探索周圍嘅世界☺️ 所以規律作息對小朋友絕對係有利㗎！如果小朋友每晚都係相約嘅時間瞓覺，而且睡前規律一致，佢哋喺心理同生理上都會習慣定時定候要瞓覺，不但令佢哋更容易入睡，亦都可以瞓得更好。初生階段嘅小朋友，就寢時間未能太固定，但係過咗初生階段，就要開始同佢地設定適合嘅就寢時間，從小培養規律作息。

對嬰幼兒嚟講，夜晚七至八點可以瞓覺絕對係最理想嘅。不過生活喺香港，要咁早比小朋友瞓覺絕對有一定難度，呢個鐘數好多爸爸媽媽分分鐘都仲開緊會覆緊email未收工...🤦‍♀️😣😣 即使父母因為各樣因素唔能夠安排小朋友早啲瞓覺，都要記住佢哋每晚嘅就寢時間應該大致相同，唔好有多個一個鐘嘅差距😉