top of page

【如何應對睡眠倒退期?】

近日同大家分享咗小朋友出世頭兩三年會經歷嘅睡眠倒退期,相信好多爸爸媽媽都會問,要經歷咁多次睡眠倒退期,可以點樣處理呢?🤔👇



1️⃣ 保持冷靜、調整心態

當經歷緊睡眠倒退期, BB嘅哭鬧會比較多,令到父母心理上形成唔少壓力,但係記住除咗4個月睡眠倒退期,其他睡眠倒退期只有短暫性嘅影響。只要你用合適嘅方法、BB又有良好嘅睡眠習慣,睡眠倒退期好快會過去。不過如果你正在經歷4個月睡眠倒退期,你就要諗吓你係唔係安於現況,還是想好好利用呢個機會調整BB嘅睡眠,幫佢建立返良好嘅睡眠習慣。


2️⃣ 按實際情況調整作息時間表

絕大部份嘅睡眠倒退期只係短暫性,如果小朋友小睡出現問題,你可以輕微調整作息時間表,例如將小睡延後15至30分鐘,減少佢哋哭鬧嘅時間。


3️⃣ 堅持原本嘅做法

喺睡眠倒退期間,要維持原本嘅時間表有一定困難,但你嘅目標係盡量緊貼原有嘅時間表,一切都維持原本嘅做法,唔好同BB建立唔健康嘅睡眠習慣。遇到有分離焦慮嘅BB,你可以喺佢醒嘅時候抱佢多啲、攬佢多啲,但記得唔好形成抱睡嘅習慣呀!


4️⃣ 建立健康嘅睡眠習慣

所謂「預防勝於治療」,如果BB一直有健康嘅睡眠習慣同睡眠模式,即使佢哋經歷睡眠倒退期,呢個時期都會好快過去。所以我哋應該由BB細個開始,培養佢哋良好嘅睡眠習慣。換句話說,如果你已經經歷咗/經歷緊4個月、8個月嘅睡眠倒退期,唔希望喺BB 一歲、歲半,甚至兩歲嘅時候面對相同嘅棘手問題,你就要好好把握機會,盡快調整BB嘅睡眠模式喇!


5️⃣ 尋求協助

面對嬰幼兒嘅睡眠問題,父母或多或少會有好多無形嘅壓力,記得要搵身邊嘅家人同朋友同你分擔下!父母都係人,都需要休息時間,父母要有時間休息,情緒先會較好,處理BB嘅問題時都會更加輕鬆!如果真係搞唔掂,記住,有嬰幼兒睡眠顧問可以幫到你!我嘅職責就係幫BB調整睡眠,搵一個最合適嘅模式,改善你同小朋友嘅睡眠質素😉




720 views0 comments

Recent Posts

See All

Comments


Post: Blog2_Post
bottom of page