BB啱啱出世頭幾個月，生理時鐘/晝夜節律 (circadian rhythm)未成熟，唔係太識得分晝夜，好容易會出現日夜顛倒嘅情況，日頭瞓好長時間，但係夜晚就會醒好耐都瞓番。
因此，好多人都聽過要比BB喺日間接觸更多陽光 ，幫助佢哋設定生理時鐘。但係到BB瞓覺嘅時候，好多父母都依然放BB喺一間光猛嘅房間小睡，目的就係要佢哋分辨日與夜。
其實咁樣係會影響佢哋嘅睡眠質素㗎 頭幾個月嘅時候咁樣做可能問題唔大，但係當BB大左，你就會發現佢哋係一間光嘅房間係會出現好多問題，例如好難入睡、瞓得唔好、日間小睡時間短等等。
BB其實唔怕黑，反而黑暗嘅房間會令到佢哋覺得好舒服好安穩，因為就好似佢哋以前喺媽媽肚入面咁樣漆黑一片，佢哋反而會更有安全感。而且黑暗嘅環境係有助分泌褪黑激素(melatonin)，退黑激素係一種睡眠荷爾蒙，可以令我地較容易入睡，亦都可以瞓得耐啲。
過咗初生階段， BB對光線其實好敏感，光會令到佢哋難以入睡，當佢哋越來越大，想探索四周嘅環境，太光嘅房間亦會令佢哋唔願瞓覺，最終可能就會變得過分疲累，令佢哋嘅睡眠時間同質素都下降。
所以如果想改善BB嘅睡眠，不妨將間房整到漆黑一片，佢哋其實會瞓得更好㗎 如果想幫BB分辨日與夜 ，只要喺佢哋清醒嘅時候比佢哋接觸到足夠嘅陽光就可以啦！
Comments