top of page

【睡眠謬誤系列 — BB臨瞓前食多啲固體食物夜晚就會瞓得長啲】

曾經聽過唔少人話,只要夜晚嗰餐餵多啲固體食物畀BB,佢哋夜晚就會瞓得好好,可以瞓過夜。其實,咁樣唔係必定會令小朋友瞓得更好架,更有可能會帶嚟反效果😩


BB出世頭一年,奶係佢哋主要嘅營養來源,固體食物只係一個輔助角色,係幫助小朋友慢慢過渡進食更多元化嘅食物。BB胃仔好細,消化系統正在發展中,如果強迫佢哋晚餐食太多固體食物,佢哋嘅消化系統就要晚晚開OT嚟消化呢啲食物。咁樣反而有機會令BB肚仔唔舒服,瞓得唔舒服,扎醒嘅機會增加🙈 試諗吓,如果你晚晚都食buffet食到好飽去瞓覺,你個胃都會頂住頂住,瞓著都覺得辛苦吧!


加固係嬰幼兒嘅必經階段,但係爸爸媽媽一定要循序漸進引入固體食物,令BB慢慢適應。一般剛剛開始加固嘅時候,盡量喺日間午餐時段引入固體食物,一來可以更容易知道BB會唔會對某種食物有敏感,二來亦可以令佢哋有更加多時間消化固體食物。


所以,夜晚食到好飽並唔一定代表BB可以瞓得好好架!記得要按照BB嘅需要餵食,你可以offer某個份量嘅奶/食物,但係BB可唔可以食得晒,就由佢話事😉




111 views0 comments
Post: Blog2_Post
bottom of page