之前同大家分享過唔同階段嘅小睡轉換期，咁到底我哋可以點樣判斷幾時需要減少小睡次數呢？
如果BB到咗小睡轉換期嘅月齡，又出現以下嘅情況，就有可能係需要減少小睡次數喇。
喺原本嘅小睡時間唔眼瞓/瞓唔著
小睡時間瞓得着，但係好快就醒
每日最後一次小睡開始影響夜晚就寢時間，將就寢時間推遲
半夜突然醒好多次，醒咗好耐都瞓唔番
突然未天光就醒，難以再次入睡
不過要記住，以上嘅情況唔係出現一次半次，就代表要減少小睡次數。要觀察BB至少兩星期，而每星期有至少四日會出現以上嘅情況，先可以試吓BB係唔係適合減少小睡次數。要記住，過早減少小睡次數，有可能會令BB過分疲勞，令佢哋嘅睡眠質素會下降，甚至導致其他睡眠問題。
如果喺轉覺期遇到困難，可以inbox我傾下。 合適嘅時候減少小睡次數，係可以避免/解決好多小煩惱㗎！
Comments