top of page

【 安睡小貼士──3-5歲】

三歲開始,好多小朋友都唔需要日日瞓晏覺,但爸爸媽媽都要觀察會唔會日間活動時間過長,導致佢哋太攰呀!以下嘅方法可以幫小朋友夜晚瞓得更好,不妨參考一下 。


  1. 設定起床和就寢時間:小朋友每日都應該係差唔多嘅時間起床同就寢,咁樣佢哋嘅生理時鐘會比較穩定,避免日頭唔願起身,夜晚唔肯瞓覺嘅情況

  2. 營造有利睡眠嘅環境: 溫度、濕度要適中,睡房唔好太光,以促進睡眠荷爾蒙嘅分泌。 仲有盡量唔好喺房間放太多電子產品或者玩具,咁樣小朋友都會少啲誘惑要去玩啦

  3. 避免經常接觸電子屏幕: 喺現今嘅數碼年代,好多人都係機不離手,小朋友因而都會經常接觸到電子產品,但係電子屏幕所發出嘅藍光,會抑壓睡眠荷爾蒙嘅分泌,干擾我哋嘅生理時鐘,令小朋友睡意減少,睡眠質素下降。所以喺小朋友睡前至少一個鐘,就唔好再比佢哋接觸電子屏幕喇

  4. 編排合適嘅時間表: 現今有好多小朋友每日都有唔同嘅活動,既要做功課,又要參加唔同嘅興趣班,以致時間表塞得太滿。咁樣可能會令小朋友過分疲勞,生活緊張㗎! 記得要適當安排學習同休息時間,比時間小朋友放鬆下,恢復精神同體力

  5. 注意飲食: 要避免含有咖啡因嘅食物或者飲品,例如咖啡、可樂、茶、朱古力,如果真係想食,記得唔好臨瞓前食咁多呀

  6. 控制日間小睡嘅長度: 呢個階段小朋友每日需要嘅睡眠時數比起頭幾年需要嘅大大下降,有啲小朋友三歲開始就唔需要每日都瞓晏覺,但係有時候當佢哋攰可能都需要小睡片刻。不過要記住唔好俾佢哋日間瞓太耐,或者太遲先至瞓晏覺呀,因為咁樣佢哋夜晚就會冇晒睡意,搞好耐都唔肯瞓

  7. 有足夠嘅運動: 小朋友日間要有足夠嘅運動量,運動可以令佢哋更容易入睡同有更好嘅睡眠質素,父母要多啲鼓勵小朋友每日做運動呀

  8. 曬太陽:曬太陽可以促進睡眠荷爾蒙—褪黑激素嘅分泌,改善夜晚嘅睡眠質素

  9. 做個好榜樣: 小朋友鍾意模仿大人,如果父母都經常夜瞓,作息唔穩定,小朋友都好難建立健康嘅睡眠習慣㗎 !小朋友如果見到爸爸媽媽都定時定候休息,佢哋都會願意跟隨,睡眠問題就會少好多



0 views0 comments

Comments


Post: Blog2_Post
bottom of page