【Swaddling 知多點 （下）】

上次分享同大家講到swaddling嘅好處同埋需要注意嘅事項，有好多爸爸媽媽都想知道，到底BB到幾時唔再需要swaddling 呢？🤔

大部份BB喺2至6個月就慢慢唔再需要swaddling，呢個範圍好闊，因為要視乎BB嘅發展。停止swaddling嘅其中一個考慮因素係BB係唔係 #開始識得轉身 或者 #已經識得轉身 😉 最理想嘅做法係唔好等BB完全掌握轉身嘅技巧先停止swaddling，因為BB一開始學識呢種技能，唔能夠好靈活地兩邊轉身，如果繼續包住佢哋嘅手手腳腳，佢哋一翻身，就好容易處於一個唔安全嘅狀態！所以當爸爸媽媽觀察到BB開始想轉身嘅時候，已經要準備停止swaddling喇！

咁點樣停止swaddling呀？👇

✅ 直接拎走包巾/包被，用其他方法安撫BB入睡 （呢種方法要視乎BB嘅接受程度，有啲BB用呢種方法無太大反抗，但係部份BB唔太適應，頭一兩日可能會哭鬧比較多）

✅ 用循序漸進嘅方法，等BB慢慢習慣唔再需要包住手手腳腳。爸爸媽媽可以先喺全日某一個時段唔用包巾/包被，幾日後再增加唔用包巾/包被嘅時間。我建議可以跟以下嘅次序：

1）朝早醒來第一次小睡

2）夜晚嘅長睡眠

3）下午小睡

坊間有啲swaddling產品，可以有唔同嘅變化，例如Love to dream、Halo’s sleepsack swaddle，可以先放BB一隻手出嚟，幾日用再放另一隻手出嚟，慢慢習慣唔再需要包住雙手嘅感覺。即使用傳統包巾/包被，都可以試用呢種先放一隻手嘅方法，但要注意包嘅技巧😉 如果用呢種方法，爸爸媽媽幫BB放一隻手出嚟，跟以上建議嘅時間次序，等BB適應咗，就放埋另一隻手，再跟以上建議嘅時間做一次。