top of page

【「一覺瞓天光」】

「一覺瞓天光」呢五個字相信會觸動唔少爸爸媽媽嘅神經😅 可能好多父母亦都會問,到底BB幾時先可以一覺瞓天光呢?


首先,我哋要諗吓自己心目中嘅「一覺瞓天光」到底係乜嘢。有人認為係BB半夜唔好醒,有人認為係BB可以同父母一樣連續瞓7-8個鐘,又有人認為係BB可以喺夜晚連續瞓10-12個鐘。


其實「一覺瞓天光」真係無好清晰嘅定義,因為係嬰幼兒唔同嘅成長階段,定義都可以唔同。我哋必須要喺唔同階段設定合理嘅期望,就好似我哋唔會要求幾個月大嘅BB,夜晚一定要瞓到11-12個鐘先有得飲奶。

仲有要記住,可以「一覺訓天光」嘅BB,並 #唔係半夜一定唔會扎醒#唔係夜晚一定唔會郁嚟郁去 ,因為佢哋係一個人仔,唔係公仔🧸


嬰幼兒同成年人一樣,每晚都會經歷幾個睡眠周期,有時佢哋會處於淺層睡眠狀態,有時係深層睡眠,喺睡眠周期轉換嘅時候, BB係有可能因為環境聲音、溫度或其他因素而轉下身、叫兩聲、醒一醒。試諗吓,我哋自己都唔係每晚都可以連續瞓,完全唔會扎醒啦(當然... 好攰好攰好攰好攰嘅時候可能真係可以)🙈 其實大人夜晚瞓覺嘅時候都會轉下身,有時亦會扎醒一下搵被冚。嬰幼兒都一樣有機會喺睡眠周期轉換嘅時候醒一醒,但有自我安撫能力嘅BB,就算扎醒咗都可以好快再次瞓番😉


如果你嘅BB夜晚瞓覺會郁嚟郁去,但唔會喊,唔會郁醒自己;如果你嘅BB半夜會發出啲聲音,或者會喊幾聲跟住自己瞓番,其實佢都已經係瞓天光喇😉 但係如果BB半夜扎醒係會大喊,又要抱又要搖先可以瞓番,或者醒咗好耐氹極都瞓唔番,咁呢個夜醒嘅問題就要正視喇!




100 views0 comments

Recent Posts

See All

Comments


Post: Blog2_Post
bottom of page