相信唔少父母都有聽過嬰幼兒喺頭兩三年會經歷幾個睡眠倒退期，大多喺BB 4個月、8個月、12個月、18個月同24個月嘅時候出現。其實除咗呢五個較常見嘅睡眠倒退期外，BB喺5–8週大嘅時候亦會出現「倒退期」。
BB喺5–8週左右腦部發展非常迅速，係一個學習好多新技能嘅階段。比起剛剛出世頭幾個星期，BB會更八卦周邊嘅聲音同影像，又會開始認得父母嘅聲音、對父母微笑。當BB經歷緊呢個躍進期(developmental leap)嘅時候，父母會發現BB瞓得特別差😫 以下嘅情況喺呢個「倒退期」非常常見：
☹️ 難入睡、哄睡時間長
☹️ 經常出現微睡眠 (micro naps)，即瞓著1至5分鐘後會醒來
☹️ 密集式飲奶 (cluster feeding) ，每隔1至2小時就想飲奶
☹️ 作息混亂，有時醒一陣會瞓，有時醒好耐都瞓唔到
喺呢個階段， BB除咗瞓得無之前咁好之外，哭鬧嘅時間亦長咗，令唔少父母擔心BB會唔會係唔舒服 😣面對BB瞓得差、成日「日喊夜喊」，真係會令人好沮喪。不過，呢個係BB成長嘅必經階段，我哋無方法可以馬上解決所有問題，但可以從以下幾個方向着手，等父母同BB都更容易渡過呢個既痛苦又甜蜜嘅時期😉
✅ 注意BB嘅清醒時間
5–8週大嘅BB每次醒45至60分鐘就要瞓覺，如果玩得太耐令佢哋過份疲累，佢哋就更難入睡同安睡
✅ 營造理想嘅睡眠環境
睡眠環境環夠暗，溫度濕度適中
✅ 幫助BB設定生理時鐘
初生嬰兒容易出現日夜顛倒，如果BB日間每次小睡已經瞓咗兩至三個鐘，記得要溫柔地叫醒BB飲奶，避免整體作息安排更混亂
✅ 訂立睡前儀式
簡單嘅睡前儀式可以幫助BB定立睡眠規律，減少抗拒小睡嘅情況
✅ 必要時用各種方式幫助BB入睡
初生階段BB嘅自我安撫能力未成熟，好難要求佢哋每次都喺床上入睡，甚至自行入睡。如果BB全日都瞓得好差，已經非常疲倦，哭鬧得好厲害，父母可以嘗試用唔同方式安撫BB、幫助BB入睡，以免過分疲累嘅情況一直持續，令睡眠問題惡化。
