top of page

【睡前哭鬧】

有媽媽話,小朋友自小每晚臨瞓前都會好扭計,會大喊好耐,甚至用盡各種方法拖延時間唔肯瞓覺,由準備瞓覺到真正瞓着,可以係一兩個鐘...... 可以點算?😫😫


其實睡前哭鬧係一個好常見嘅現象,可以係好多唔同嘅原因所導致,有啲係暫時性(例如睡眠倒退期、生活上有轉變等等),但有啲會係持續性,經常發生,令小朋友同爸爸媽媽都承諾巨大嘅壓力😞 如果你嘅小朋友睡前哭鬧都比較多,可以留意以下因素:


1️⃣ 係咪有足夠嘅睡意?

如果小朋友最後一次小睡太遲起身,到咗預期嘅就寢時間未必有足夠嘅睡意,自然唔肯瞓好扭計。與此同時,如果小朋友日間休息唔足夠,全日積累咗好多疲倦嘅感覺,有可能都會因為過分疲勞而難以入睡,佢哋可能覺得好攰,但係好難瞓着,呢種唔舒服嘅感覺都會令睡前哭鬧比較多。所以嬰幼兒有一個穩定同合適嘅作息時間係好重要㗎!Timing啱嘅話,哭鬧係可以大大減少㗎(有興趣了解更多可以參考呢個分享👉 https://bit.ly/3uhvHXy )


[覺得好難拿捏小朋友嘅作息時間?需要啲幫助幫佢哋tune一個最理想嘅時間表?Jovial Sleepers 嘅睡眠諮詢計劃幫到你!有需要搵我傾吓😉👉 https://m.me/jovial.sleepers ]


2️⃣ 臨瞓前嘅活動係咪太刺激?

無論係BB定係幼兒,臨瞓前都唔應該有太刺激嘅活動(例如睇電視、打機、勁歌熱舞等等)。記得臨瞓前應該有固定嘅睡前規律,給予小朋友足夠嘅時間放鬆,等佢哋慢慢由「開機狀態」變成「休眠狀態」。


3️⃣ 係咪心理上未準備好?

嬰幼兒係六至八個月大開始會出現分離焦慮,一歲半至兩歲更係分離焦慮嘅高峰期,係呢啲階段,當BB知道瞓覺等於要同媽媽分開,都會覺得好唔捨得,哭鬧都會相對比較多。媽媽可能發現有時BB臨瞓前比較乖,但有時會比較扭計😫 喊,其實係愛你,因為唔捨得你呀❤️ 如果係因為呢個因素,爸爸媽媽可以重新檢視同小朋友嘅睡前規律,預留多5分鐘嘅親子時間,攬下錫下抱下BB,等佢哋多少少時間喺心理上都ready要瞓覺。


4️⃣ 係咪肚餓?

呢個因素對月齡比較細嘅BB影響較大,BB肚餓,真係點樣都瞓唔到,所以父母可以按需要喺BB臨瞓前增加餵食份量或者次數。


5️⃣ 睡眠環境係咪理想?

房間會唔會太光,或者有好多千其百趣嘅小玩意?呢啲因素都令小朋友以為「仲有得玩」,所以睡意減少唔願瞓。


6️⃣ 係咪測試行為?

歲幾兩歲關始,小朋友可能會有好多測試行為,試吓爸爸媽媽嘅「底線」🙈 例如喊大聲啲,爸爸媽媽係唔係就會抱住我瞓、俾我瞓大人床?大喊大叫係唔係就唔使瞓住,可以繼續玩?

如果小朋友已經唔再瞓四邊圍住嘅嬰兒床,可以自己爬落床,佢哋喺就寢時間時覺得自己唔眼瞓,仲好想玩,於是就不斷玩走落床離開房間嘅遊戲😅 (係.... 佢哋真係會覺得好好玩)。如果你認為小朋友嘅哭前哭鬧係測試行為,你就需要同佢訂立一啲瞓覺規則喇!



14 views0 comments

Comments


Post: Blog2_Post
bottom of page