到底何謂「早醒」？有啲爸爸媽媽可能覺得BB朝早6:30醒，係屬於早醒 🤨 係嘅，呢個時間對唔少大人來講的確好早😆 不過對嬰幼兒嚟講，朝早6至8點起身其實係好正常㗎！（當然，我明白如果BB接近8點...或者8點幾先起身就最好啦😂）
所謂「早醒」，係指嬰幼兒早過朝早6點就醒咗，而且唔能夠再次瞓番，例如有啲BB朝早5點就起身，要同爸爸媽媽玩😩 如果你嘅BB都有早醒嘅問題，可以留意吓會唔會係以下原因所致👇
1️⃣ 作息時間唔合適
BB嘅作息時間安排要配合佢哋唔同階段嘅需要，如果BB嘅就寢時間過早，佢哋清晨五點嘅時候已經瞓夠夜晚嘅睡眠時數，自然未天光已經醒🙈 不過，就寢時間遲都唔代表BB唔會未天光就起身，因為太遲嘅就寢時間會令佢哋好容易出現過分疲勞嘅狀態，導致早醒㗎！同樣地，日間小睡嘅長短亦會導致BB早醒問題。日間瞓得太多，夜晚就唔會有足夠嘅睡意；日間瞓得太少，夜晚就寢嘅時候都好容易出現過分疲勞，令身體產生壓力荷爾蒙， BB亦難以安睡。
2️⃣ 睡眠環境開始光
光線話俾我哋嘅大腦聽幾時係朝早，幾時係夜晚，有啲BB對光線非常敏感，當接近清晨時分（尤其是夏天），窗邊或者窗簾開始滲光， BB嘅生理時鐘就誤以為夠鐘起身，慢慢咁會養成清晨時分起身嘅習慣。
3️⃣ 房間溫度
BB對溫度比較敏感，太熱太凍都會令佢哋瞓得唔好，尤其是清晨時分BB多處於淺層睡眠狀態，如果房間溫度唔合適，佢哋會瞓得唔舒服，導致早醒問題😴
4️⃣ 肚餓
肚餓絕對會令BB唔能夠安睡，尤其是對月齡比較細或者加固未太理想嘅BB嚟講，佢哋真係未必可以十幾個鐘都唔飲奶。
