過咗一歲嘅睡眠倒退期，去到一歲半，又有另一個睡眠倒退期？爸爸媽媽可能會話：「唔係呀馬？」😅
無錯，小朋友一歲半左右，爸爸媽媽好大可能又遇到一個睡眠大挑戰，包括難以入睡、睡前哭鬧較多，夜晚頻頻扎醒等等🙈 不過記得我之前講過，其實所謂嘅「倒退期」(regression)，換過角度睇其實係一個進步期 (progression)，係因為小朋友喺其他方面發展迅速、有所進步，先會對佢哋嘅睡眠造成影響。
一歲半嘅小朋友，自主意識增強，佢哋開始想決定自己要做乜嘢，佢哋覺得自己唔眼瞓，當然用盡方法唔肯瞓覺啦！記得我嘅小朋友18個月左右都有經歷睡眠倒退期🤦♀️ 一直以來，小睡前我都會同佢睇一本圖書，去到經歷緊睡眠倒退期嘅時候，佢每睇完一本，都會喊住要睇第二本、第三本、第四本.......沒完沒了🤦♀️ 好明顯目的只有一個，唔要瞓覺😏😏 不過，佢有張良計，我有過牆梯😆 所以呢次嘅睡眠倒退期都唔係太耐先渡過。
而且18個月亦係分離焦慮嘅另一個高峰期，好多小朋友都希望爸爸媽媽陪係身邊，佢哋知道瞓覺即係要同爸爸媽媽分開，一定會好唔捨得，所以即使一直瞓得好嘅小朋友，去到呢個階段都會出現短暫嘅「睡眠倒退」。
