前幾日嘅post提及初生嬰兒會出現「驚嚇反射 (startle reflex)」，到底驚嚇反射即係乜嘢？
驚嚇反射亦叫莫羅氏反射 (Moro reflex)，係一種初生嬰兒常見嘅原始反射。BB剛剛出世嘅時候，神經發展未成熟，會出現好多唔同嘅反射行為。驚嚇反射係一種當BB面對外在環境嘅刺激時所產生嘅本能反應。
一般BB頭一個月驚嚇反射會較為明顯，到BB大約四至六個月呢種反射行為會慢慢消失。驚嚇反射係出於BB嘅本能反應，所以出現驚嚇反射並唔代表BB有問題，反而係話俾我哋聽佢哋嘅腦神經同肌肉組織都好正常😉
出現驚嚇反射時，我哋會觀察到BB雙手同身體會突然抖動、手臂手指向外伸張，有啲似「自己嚇到自己」嘅反應。驚嚇反射會容易令BB喺睡夢中驚醒，繼而大喊求救，所以喺初生階段，用包被/包巾包住BB，可以減低佢哋因為驚嚇反射而扎醒嘅情況。
