之前分享過關於小睡轉換期嘅資訊，今日不如講吓點樣幫BB減少一次小睡。
(1) 逐漸延後原定小睡時間15分鐘 我哋需要循序漸進改變小朋友嘅生理時鐘，剛剛開始嘅時候，嘗試將小睡時間延後15分鐘，例如小朋友一向早上11:00小睡，喺頭3日可以將小睡時間延至11:15，穩定落嚟之後再延後15分鐘至11:30，直到合適嘅小睡時間。 呢個方法可以令小朋友更快適應新嘅時間表，避免造成過分疲累嘅情況。
(2) 安排一啲新奇嘅活動，令BB唔會睡眼惺忪 喺小睡轉換期開始嘅時候，有啲BB可能會喺原定嘅小睡時間已有睡意，所以父母可以準備一啲新奇嘅活動，盡量同小朋友有多啲交流，傾吓計分散佢哋嘅注意力，幫佢哋慢慢將小睡時間推遲。 所謂安排一啲新嘅活動，只係希望將小睡時間延後少少，而唔係一下子延後一兩個鐘，過分急進會搞到小朋友好攰㗎！ 如果有需要，父母可以喺呢段時間帶小朋友去到戶外嘅地方，有充足嘅陽光下， 佢哋冇咁容易瞓着㗎！ 不過記住，盡量避免喺呢啲時間做一啲令佢哋好容易瞓着嘅活動，例如放佢哋喺BB車推住行，坐喺搖搖椅等等，因為搖晃嘅感覺都係令佢哋好容易瞓着。
(3) 維持原有的睡前儀式 嬰幼兒冇時間嘅概念，佢哋唔識得睇時鐘，唔會知道小睡嘅實際時間，但係如果小朋友係瞓覺之前有固定嘅睡前儀式，佢哋就會知道完成咗睡前儀式，就即係要瞓覺。
(4) 提早當日就寢時間 剛剛減少小睡次數嘅時候，因為BB嘅生理時鐘未穩定，佢哋嘅小睡時間可能會縮短，日間小睡時數唔足夠。如果出現呢個情況，就需要提早佢哋當晚嘅瞓覺時間。父母可以按情況將就寢時間提早30至60分鐘，等小朋友夜晚可以休息足夠，補返日頭瞓唔夠嘅情況。（有一點要注意，如果喺小睡轉換期BB嘅小睡時間未穩定，導致佢哋遲咗瞓著遲咗醒，就可能有需要將當日嘅就寢時間延後少少，等佢哋喺睡前有足夠嘅活動量同睡意。記住如果BB唔攰，就算你按原定時間放咗佢落床，佢都可能要搞好耐先瞓得着）
要改變小朋友原本小睡嘅時間，係需要一段適應期，我哋需要循序漸進去改變，唔好過分心急，等小朋友嘅生理時鐘慢慢適應新嘅時間表。喺小睡轉換期間，小朋友嘅小睡次數可能唔太穩定㗎！如果係小睡轉換期間遇到問題，歡迎inbox我，有需要可以進行單次嘅諮詢，幫BB順利過渡小睡轉換期。
