睡前規律(bedtime routine) 係指我哋臨瞓前會做嘅一系列活動，例如刷牙洗面、換睡衣、聽音樂等等。有人將睡前規律比喻為「睡眠魔法」，因為一致嘅睡前規律可以協助小朋友建立健康嘅睡眠習慣，令佢哋可以瞓得更好☺️
嬰幼兒都喜歡有規律嘅生活，因為呢啲規律可以讓佢哋預計到即將會發生咩事，令佢哋覺得更有安全感。及早為BB建立睡前規律，可以幫佢哋臨瞓前放鬆一下，收拾心情準備瞓覺，減少睡前哭鬧，有助BB入睡同安睡。
美國兒童睡眠醫學權威學者明德爾博士 (Dr. Jodi A. Mindell) 嘅研究發現，如果父母每晚都同小朋友進行睡前規律，可以帶來好多好處，包括小朋友嘅就寢時間較早、入睡時間較短、夜醒次數同時間減少、睡眠時數增加等等。研究結果指出，每晚都進行睡前規律嘅嬰幼兒，比起無睡前規律嘅小朋友，夜晚嘅睡眠時數會多大約1.5小時㗎！
除此之外，睡前規律亦係最親密嘅親子時間。有啲爸爸媽媽係全職工作，平日陪伴BB嘅時間唔算好多，睡前規律就正正係一個最好嘅親子時間，雖然時間短，但「質」比「量」更重要，每晚花少少時間同BB一齊進行睡前規律，已經可以大大拉近親子關係❤️
幾時開始為BB建立睡前規律並冇一個固定嘅時間表，就算初生嬰兒都可以有睡前規律。不過， BB剛剛出世頭幾個星期，爸爸媽媽有好多野要處理，可以先照顧自己同BB其他方面嘅需要，唔需要急住一定要為BB建立睡前規律。當BB滿月後生活各方面開始穩定少少，睡眠發展逐漸成熟，爸爸媽媽就可以開始為BB建立睡前規律，培養佢哋健康嘅睡眠習慣😊
為BB建立理想嘅睡前規律，可以留意以下嘅「睡前規律ABC」👇
⭐️ Atmosphere 氣氛
睡前儀式應該係喺平靜嘅氣氛下進行，令BB慢慢放鬆，準備瞓覺。
⭐️Brightness 光暗
要注意房間嘅光暗度，進行睡前儀式嘅時候要將房間嘅燈光較暗。
⭐️Consistency一致性
留意睡前規律嘅一致性，睡前嘅活動每日都應該大致相同。
睡前規律係改善BB睡眠嘅好幫手，快啲為你嘅BB訂立獨有嘅睡前規律啦😉
