當BB大個咗，好多父母都會認為如果要BB夜晚瞓得好，日頭就唔好俾佢哋瞓，keep住同佢哋玩，等佢哋夜晚有充足嘅睡意，一覺瞓天光。
其實呢個諗法係唔啱㗎！咁樣好大可能會令到BB過分疲累，半夜扎醒同埋大喊嘅機會就會大好多。 一日半日瞓少咗問題可能唔大，但係長期咁樣，各種睡眠問題就會慢慢浮現
BB喺3-5歲前仲要瞓晏覺㗎，但係小睡嘅次數同埋時間就會隨住佢哋嘅成長而遞減。所以只要知道佢哋喺每個階段嘅睡眠需要，日間小睡次數同時間安排恰當，佢哋日頭同夜晚都自然會瞓得好啦！
想BB瞓得好，有一句說話一定要記得，就係 ‘sleep begets sleep’，意思係「睡眠生睡眠」 日間瞓得足夠，夜晚睡眠質素亦會提升。相反，BB日間冇得瞓，變得過分疲累，佢哋身體嘅皮質醇 (cortisol)就會上升，呢種壓力荷爾蒙會話比身體知佢哋唔需要瞓覺，令BB望落精神好多。喺正常情況下，身體嘅皮質醇有固定嘅日夜規律，日間皮質醇濃度會較高，但到咗夜晚就會降低。如果BB經常都過分疲累，佢哋嘅皮質醇分泌就會持續過高，容易引發好多睡眠問題，例如難以入睡、半夜驚醒、早醒等等。
所以記住，3-5歲前仲要瞓晏覺㗎！
