琴日個post提及可以觀察小朋友嘅睡眠訊號，喺適當嘅時候比佢哋休息，避免佢哋出現過分疲勞嘅情況。今日想同大家分享一個實例，等大家了解多啲👇
某日，我帶咗我個囡去探十個月大嘅Baby Y，我哋去到嘅時候原來Baby Y剛剛瞓著咗，我哋於是小心翼翼，唔想太大聲嘈醒佢... 不過Baby Y瞓咗唔夠半個鐘就醒咗瞓唔番🙈（可能聽到我哋把聲😅 據說平時佢嗰個時間會瞓一個幾鐘）
於是Baby Y嘅媽媽就帶咗佢出廳，起初Baby Y個樣都有啲攰，好似未瞓醒咁要攬住媽媽...呢個狀況維持左15-20分鐘左右，跟住Baby Y就開始好精神好興奮...仲玩咗好幾個鐘，完全毫無睡意 😅 我哋走咗之後， Baby Y就瞓咗喇... 不過臨瞓前嘅哭鬧就比平時多，而且亦都瞓得唔耐...
其實Baby Y由疲累變成好精神，甚至出現亢奮嘅狀態，表示佢攰得滯喇😣 當BB有睡意嘅時候唔能夠得到充足嘅休息，佢哋嘅身體會不斷釋出皮質醇 (cortisol)，呢種壓力荷爾蒙會話俾BB聽佢要精神啲，唔好瞓着 🙈🙈 呢種壓力荷爾蒙要時間慢慢減退，所以就算過咗一陣BB瞓得着，佢都未必可以瞓得耐，因為身體內嘅皮質醇分泌依然偏高。
當然，上述情況有時係唔可以完全避免，生活中有好多唔同嘅因素會影響小朋友瞓覺，例如嗰日要去健康院打針、樓上樓下突然鑽嘢有巨響等等，都會令小朋友瞓少咗。我哋可以盡量配合小朋友嘅作息時間，避免以上情況發生，但係如果呢種情況真係出現咗，我哋要有心理準備小朋友嗰日嘅睡眠質素可能唔係太好，哭鬧可能會比較多。如果可以嘅話就盡量提早就寢時間，等佢夜晚瞓返足夠。BB有一日半日瞓得差咗，唔會對佢有好深遠嘅影響，但要記住之後幾日一定要俾佢瞓番足夠☺️
⭐️ 重溫 【孩子的睡眠訊號】
