前兩日同大家提及嬰幼兒嘅睡眠債問題，爸媽們對於點樣幫小朋友「還債」都有唔同嘅睇法。今日就等我分享吓一啲可行嘅處理方法😉
睡眠債未必可以一日就還清，琴日BB瞓少咗兩三個鐘，唔係今日瞓番多兩三個鐘就可以解決問題。還清「債務」嘅時間，好視乎BB累積咗幾多睡眠債，同埋BB自己嘅狀況。
最理想嘅做法係將夜間睡眠放喺第一位，嘗試讓小朋友有充足而且優質嘅夜間睡眠💤 因為夜晚嘅睡眠係最具修復性，可以更快幫BB回復體力叉足電。要延長夜間睡眠，提早就寢時間係首選。若然朝早BB無喺平時醒嘅時間起身，都可以比佢哋瞓晏少少，但係唔應該比平時起身時間遲多個一個鐘，以免影響佢哋整體嘅生理時鐘。
至於日間小睡，對於月齡比較細嘅BB，佢哋每次瞓醒之後嘅活動時間唔會太長，的確有可能要按需要增加多一次小睡。但去到幼兒階段，小朋友日間只係需要一至兩次小睡，所以可以延長每次小睡時間。不過要記住，小睡時間亦唔可以比平時多太多，以免影響夜間就寢時嘅入睡情況呀！（如果日頭瞓多好多，令佢哋夜晚又遲咗瞓，只會形成惡性循環）
如果你嘅小朋友已經長期「負債」，以上嘅方法未必完全適用，要真正「還清債務」，就要從根源入手！
