餵夜奶係一個幾甜蜜又痛苦嘅時刻😌 試諗吓，人生有幾多時間可以係喺半夜同BB一對一相處，無微不至咁照顧小朋友呢😉 不過，當長年累月都要夜晚起身餵奶，好多父母都不禁會問，到底幾時先「戒夜奶」......
講到「戒夜奶」，首先要睇吓你對夜奶嘅定義係乜嘢👇
如果你希望係00:00-06:00 呢段時間唔需要再起身餵BB飲奶，夜晚可以連續瞓5-6鐘，咁4-6個大嘅BB已經逐漸可以做到 (有啲BB甚至更早已做到) 😉
如果你希望BB夜晚睡眠係連續瞓10-12個鐘，完全唔駛飲奶，咁或許要等到BB大約6個月大左右。當然，每個BB嘅發展步伐都唔一樣，有啲BB喺4-6個月大可以做到，亦有啲小朋友要去到9-12個月大先可以喺晚間睡眠連續瞓，一餐奶都唔需要飲。
所以所謂戒夜奶，一方面要睇小朋友自己嘅成長、發展步伐，另一方面都要睇吓父母嘅期望。
不過，如果你嘅小朋友已經一歲以上，但係仍然半夜醒咗需要飲奶，其實好大可能已經唔再係因為成長發展上有生理需要飲奶，而係習慣性半夜飲奶😣 呢個問題父母就需要正視，否則真係好多小朋友去到返幼稚園都仲要半夜飲奶。
你有冇面對緊小朋友喺幼兒階段仍要半夜飲奶嘅問題？如果你希望了解多啲點樣處理，可以留言簡短地分享你嘅情況同疑問，等我整理好大家嘅問題同困難，再出post分享😊
