下個月就係新嘅學年，相信唔少爸爸媽媽都開始為小朋友準備返幼稚園嘅嘢，亦要開始慢慢同佢地調整作息喇😉 近來都收到啲媽媽嘅查詢，想知道如果小朋友返全日班，應該點樣安排作息，所以今日想喺度同大家做少少分享。
2-3歲嘅幼兒絕大多數日間仲需要一次午睡，而日間瞓咗幾耐會影響佢哋夜晚嘅睡意。最理想小朋友夜晚至少有十小時嘅睡眠，日頭亦唔好多個兩小時。如果發現小朋友日頭喺學校瞓得太多，影響夜晚嘅就寢時間，建議可以同老師夾一夾，縮短小朋友午睡嘅時間。爸爸媽媽可以同老師有密切嘅溝通，如果小朋友嗰日喺學校無瞓晏覺，夜晚就需要提早返就寢時間，等小朋友夜晚瞓番11-12小時。
一般嚟講小朋友喺3-5歲期間，如果夜晚睡眠充足，日間就慢慢唔再需要午睡。加上返全日班可以喺學校可以同老師、同學仔一齊玩，好多小朋友都未必會午睡😆 但返學會接觸到唔同嘅嘢，小朋友好多時都會覺得攰左，所以我建議父母喺小朋友放學後要安排一啲靜態嘅活動，避免太具刺激性嘅活動，亦要提早晚餐同就寢時間，確保小朋友夜晚可以瞓到10至13小時。如果小朋友喺學校有午睡，父母可以同老師溝通一下，睇吓小朋友瞓咗幾耐、幾點起身，咁樣就可以更容易安排一個合適嘅就寢時間😉
另外，有啲父母會擔心喺學校環境唔同咗，小朋友未必瞓到覺。其實小朋友適應群體生活嘅能力比我哋想像中高，加上喺學校有「朋輩壓力」😆😆 大多數好快就已經可以適應到！如果平時小朋友瞓覺會有安撫物品，例如公仔或者被仔，都可以考慮比小朋友帶埋安撫物品返學校陪瞓晏覺😊
