「每晚想做睡前儀式都係拖字訣…」
「每日叫佢去瞓覺都叫到我個人忟晒…」
「臨瞓前佢勁hyper，仲會做體操，唔肯瞓…😩」
以上係同唔少媽媽傾談期間嘅真實對話… 你又有冇類似嘅經歷？🙈🙈
仔仔囡囡仲係BB仔嘅時候，你想佢哋瞓覺多係直接抱佢哋入房做睡前儀式就搞掂，但當小朋友去到幼兒階段識行識走，佢哋就再唔係「任你抱任你舞」… 夜晚同佢哋瞓覺就好似變得愈來愈高難度，甚至要佢哋夜晚乖乖地去瞓覺會好似鬧交咁🤦♀️
呢個情況係好常見🙈 小朋友大咗，活動時間長咗，求知慾又高咗，自然都想把握每分每秒去玩去學習啦！我記得我囡囡一歲半左右都已經同我講「我唔瞓覺，我要學習」😑😑 當時我心諗：你真係咁好學㗎咩…日後讀書係咁就好喇🤣🤣
每位幼兒去到呢啲階段總會用言語或者行動話你知佢唔想瞓覺🤪 但想佢哋合作少少，又唔係完全無方法嘅！留意以下幾點幫唔幫到你啦😉
1️⃣ 合適嘅作息時間
1.5歲後小朋友嘅活動時間長咗，佢哋亦會把握機會探索四周圍嘅事物，父母要確保小朋友喺瞓覺嘅時候有足夠嘅睡意。但記住千祈唔好以為放晒佢哋啲電就會令佢肯乖乖合作，如果佢哋攰得滯，隨時出現亢奮狀態，就會更難乖乖地瞓覺喇！
2️⃣ 輕鬆愉快嘅睡前儀式
小朋友從細開始應該解立有規律嘅睡前儀式，去到幼兒階段，睡前儀式可以按照小朋友嘅喜好而定，例如有啲小朋友鍾意唱歌，有啲鍾意睇書，有啲鍾意玩瑜伽🧘♀️😌 睡前儀式要夠「好玩」，等小朋友覺得準備瞓覺都係一件開心嘅事☺️ 當然，絕對唔係小朋友任何要求我哋都順從，我哋要確保睡前儀式嘅活動都係平靜同輕鬆，太刺激嘅活動就唔適合喇！父母可以考慮喺睡前儀式嘅過程多啲比幼兒做選擇，又或者整張Bedtime Routine Chart，同小朋友一齊剔低已完成嘅活動。呢啲方式都可以令小朋友覺得喺成個過程有更多控制權，會相對願意合作㗎！
3️⃣ 溫柔而堅定嘅規限
幼兒最大嘅特質就係boundary testing，不斷挑戰我哋嘅底線😆 去到瞓覺當然都唔例外啦！「我唔瞓… 我唔想瞓… 我唔眼瞓… 玩多一陣先瞓… 睇多一本書先瞓… 」等等都係好常見🤨 所以父母一定要讓小朋友知道規矩係乜嘢，唔駛鬧、唔駛炆憎，只需溫柔但清楚地設限，一致去做，小朋友好快就會明白😉
4️⃣ 適當嘅屏幕時間
而家呢個世代實在離不開電子產品，小朋友大咗甚至會要求睇電視、手機，但要記住電子屏幕嘅藍光係會干擾睡眠荷爾蒙㗎！所以睡前至少1-2小時就要遠離電子屏幕喇！
