過咗初生階段， BB開始有比較穩定嘅時間表，同時佢哋會開始探索世界，各方面嘅發展迅速，出現嘅睡眠問題亦會隨之增加 呢個時候要快啲幫佢哋建立良好嘅睡眠習慣呀！
了解BB嘅睡眠需要 ：4個月左右， BB日間嘅小睡會開始穩定，知道佢哋每日嘅睡眠需要，就可以作出適當嘅安排喇
了解BB嘅「眼瞓信號」：雙眼無神、揉眼睛、打呵欠、動作變慢、注意力分散、大聲哭泣等等都係BB話俾你聽佢已經眼瞓，甚至好眼瞓喇
建立睡前儀式 ：可以訂下一啲每次瞓覺之前都會做嘅活動，等BB知道做呢啲活動就等於就嚟要瞓覺
設定起床和就寢時間 ：BB有較穩定嘅時間表，應該每日都係大約時間起身，夜晚都係相約嘅時間瞓覺，咁樣佢哋嘅生理時鐘穩定，睡眠質素都會提升
日間小睡充足 ：‘Sleep begets sleep’ 睡眠生睡眠，日間瞓得好，可以避免BB過分疲勞，佢哋夜晚嘅休息都會較好
BB清醒嘅時候放佢落BB床： 唔好等BB好眼瞓嘅時候先放佢落床，喺合適嘅時間放佢落床，可以俾機會佢學習自行入睡
營造有利睡眠嘅環境：溫度、濕度要適中，睡房要暗，等BB可以係一個舒適嘅環境休息
有合適嘅活動量：BB嘅活動時間會隨着佢哋成長而拉長，要確保佢哋有合適嘅活動時間，唔俾佢哋放電或者放晒佢哋啲電，佢哋都會瞓得唔好㗎
日間要吸收足夠嘅熱量： BB係呢段期間各方面嘅發展迅速，活動量亦都不斷增加，要確保佢哋日間食得足夠，夜晚先唔會因為肚餓而醒
曬太陽： 日間嘅陽光可以幫助BB分辨日與夜，而且曬太陽亦可以促進睡眠荷爾蒙—褪黑激素嘅分泌，改善夜晚嘅睡眠質素
Comentarios