月齡比較大嘅BB一般作息時間較為穩定，唔少爸爸媽媽都會為BB建立每日嘅時間表。好多時爸爸媽媽都會問，倘若BB病咗或者打完針發燒，其實係咪應該仲跟住原有嘅時間表呢？應該點樣安排佢哋嘅作息呢？🧐
BB同大人一樣，病咗最需要係準時食藥同有足夠嘅休息，瞓覺絕對係增強抵抗力嘅好方法！所以如果BB病咗或者打針後發燒，其實我哋唔需要過分執着要跟隨原定嘅時間表，反而應該留意BB嘅眼瞓訊號🥱💤，當佢哋攰就畀佢哋瞓覺，除非夠鐘食藥，否則一般唔需要故意叫醒佢哋，亦無需控制日間嘅睡眠時間。總之，BB瞓到就畀佢哋瞓多啲💪
另外，我會建議盡量保持BB原有嘅入睡方式，如果BB一直係喺BB床瞓，就試下先用同樣嘅方式畀BB瞓覺，如果佢哋真係因為好唔舒服而瞓唔到，就可能需要畀多啲安撫氹佢哋瞓喇😣 喺嗰啲moment，有時要抱睡、搖睡、陪睡都真係在所難免。
