top of page

【同床瞓 (co-sleeping)好唔好?】

同BB同床瞓 (co-sleeping)係好定唔好,無論喺香港定係外國,都係長久以來好多父母爭論嘅問題之一😅偶然亦會收到媽媽們嘅查詢,問我到底應唔應該繼續同BB同床,今日就想同大家分享吓我嘅睇法,同埋等大家了解吓同床瞓嘅利弊。


從睡眠安全同睡眠質素兩大方向睇,同BB同床瞓唔係一個最合適嘅方法,如果環境許可,我絕對建議爸爸媽媽比BB自己瞓係獨立嘅嬰兒床😉 BB可以同父母同房不同床,咁樣可以避免瞓大人床嘅時候可能存在嘅風險(例如較重嘅被鋪或者大人嘅睡姿)。除此之外,嬰幼兒嘅睡眠同大人唔同,有啲BB瞓覺嘅時候會叫幾下喊幾下繼續瞓,如果同床瞓,好多時父母好急於安撫BB, 令BB學習自己繼續瞓嘅機會減少,長遠BB瞓覺扎醒大喊嘅次數反而會增加。


其實係咪同BB同床瞓好取決於父母嘅意向,如果父母認為呢個安排好舒服、好合適自己,當然可以繼續。大家可以衡量下同床瞓嘅利弊,再諗諗呢種方式係咪適合自己嘅家庭😊


同床瞓嘅好處:

-方便餵哺母乳

-父母較快可以安撫BB,減低對其他家人嘅騷擾

-提升父母同BB嘅親密感 (bonding)


同床瞓嘅弊處:

-增加嬰兒猝死症 (SIDS)風險* (尤其對一歲以下嬰兒)

-BB半夜扎醒大喊大叫次數較多,情況亦會維持較耐^

-父母同BB瞓覺時互相干擾,影響睡眠質素

-日後會較難分床瞓或分房瞓

-大人床非專為嬰兒而設,床褥或床邊都有安全風險


* 美國兒科學會(American Academy of Pediatrics)提倡父母應該同嬰兒「同房但不同床」,並指出此安排可以降低多達50%嘅猝死率。


^ 挪威公共健康局(Norwegian Institute of Public Health)曾調查近56,000名嬰幼兒嘅睡眠習慣,結果發現嬰幼兒喺半歲至一歲半期間夜醒情況會有所改善,但係同床瞓嘅BB會較常有長遠嘅睡眠問題,例如夜晚可以連續瞓嘅時數較短、夜醒次數較多。






18 views0 comments

Comments


Post: Blog2_Post
bottom of page