【應該幾時戒奶嘴？】

前幾日同大家分享過安撫奶嘴嘅問題後，收到唔少媽媽嘅查詢，想知道幾時戒奶嘴先係最好 🤔

其實幾時戒奶嘴同比唔比BB食奶嘴一樣，都好取決於父母嘅選擇。不過，喺唔同階段戒奶咀，方式會唔一樣，容易程度都會有少許差別。

喺BB四至七月大嘅時候戒奶嘴相對容易，雖然部份BB喺呢個階段會開始依賴奶嘴入睡，但係佢哋學習能力好快，只要做好準備，BB好快就可以學習用其他方式入睡。

而美國兒科醫學會亦建議，當BB六個月大嘅時候，父母應該限制或停止比BB使用安撫奶嘴。

當BB七至八個月大之後，戒奶嘴嘅難度會相對增加，因為BB對呢種安撫工具嘅依賴性變得越來越強，好多時除咗入睡嘅時候需要奶嘴，瞓醒亦可能都需要有奶嘴陪伴在側😉 所以當BB越來越大，爸爸媽媽好多時都要有一定嘅決心同耐性先可以成功幫BB戒奶嘴。

如果去到九至十個月大，BB依然有食奶嘴嘅習慣，好多時就會等佢哋再大啲，去到2-3歲左右再戒奶嘴喇。因為當小朋友大咗，認識嘅嘢多咗，爸爸媽媽可以用各種方式幫佢哋同奶嘴道別，戒奶嘴嘅過程會相對容易😊