我哋每日都要瞓覺，因為瞓覺對我哋嘅身心健康同發展有重要嘅影響。對嬰幼兒嚟講，瞓覺更加係非常重要。佢哋瞓得好，心情、胃口同身心發展都會好。
好多人都會知道，瞓覺可以令我哋疲倦嘅身體得到休息，幫身體叉叉電。同時，瞓覺嘅時候我哋亦都可以畀時間身體修補肌肉，消除新陳代謝物，增強免疫力。
除此之外，瞓覺亦都幫我哋調整荷爾蒙，分泌生長激素。瞓覺時候分泌嘅生長激素係比我哋清醒時候多三倍，所以要小朋友快高長大，瞓覺係一個關鍵因素。 研究亦指出，若嬰幼兒有足夠嘅睡眠，佢哋嘅嘅記憶力、反應能力、學習能力都會比較好。
早喺1925，Dr. Lewis M. Terman（特曼博士）已經做咗一個研究指出瞓得好嘅小朋友，智商係高過瞓得唔好嘅小朋友。佢研究嘅3000個小朋友入面，喺每一個年齡層，智商測驗成績比較高嘅小朋友都有一個共通點，就係夜晚瞓得好。
照顧小朋友有時真係會身心俱疲，但如果小朋友瞓得好，作息穩定，問題自然就會少好多，咁家長亦都可以爭取時間好好休息啦 。
既然瞓覺係咁重要，我哋又點知道BB或者小朋友係咪瞓得足夠呢？嚟緊我會再講下睡眠不足嘅徵兆，同埋各個年齡層嘅睡眠需要。
