好多人聽到「睡眠訓練」呢四個字，都會馬上聯想到「BB喊、喊、喊」，甚至覺得進行睡眠訓練就等於要BB一直喊到瞓着完全唔理佢哋。其實呢個都係普遍人對睡眠訓練嘅誤解😞呢個誤解亦係令好多人對嬰幼兒睡眠顧問有負面印象嘅原因。
「Cry it out 」的確係其中一個睡眠訓練嘅方式，亦係好多好多好多年前一個常用嘅方法，但係其實要「訓練」BB瞓得好，係有好多唔同方式，唔係一定要佢哋一直喊唔理佢哋，由佢哋喊到瞓着㗎！喺嬰幼兒唔同嘅階段，所用嘅方式會唔同；應對唔同BB嘅脾性，更加要喺睡眠訓練方式上作出微調。即使進行睡眠訓練，都有方法係畀父母陪住小朋友㗎！
不過，進行睡眠訓練期間唔代表小朋友完全唔會喊，畢竟都係改變咗佢哋原有嘅睡眠模式，當佢哋唔習慣、唔喜歡嘅時候，都可能會用喊聲去表達。
其實我有時候唔太喜歡用「睡眠訓練」呢四個字🙈 對我而言，#睡眠調整 呢四個字會更為合適。因為唔係話要BB瞓得好就一定要進行「睡眠訓練」，有時候喺各方面作出合適嘅調整，加以少少方法去幫助，已經可以大大改善BB嘅睡眠問題（有興趣可以參考以下嘅分享：https://bit.ly/34jHAlo）
有啲父母一心以為進行睡眠訓練就等於小朋友會瞓得好，喺網上搜尋各式各樣嘅「訓練方式」自己實行，但最終可能係弄巧反拙😣 其實要喺各方面作出配合同調整，「訓練」先係最有效、對BB係最好！我同唔同嘅家庭進行睡眠諮詢時，並唔係單單著重教佢哋點樣做「睡眠訓練」，或者單單係點樣令小朋友自己瞓。呢啲因素或許會涵蓋喺睡眠調整計劃當中，但係其他方面嘅配合都係非常重要㗎！
記住，你要BB瞓得好，唔一定要進行睡眠訓練，就算進行睡眠訓練，亦唔代表你完全唔理BB由佢一直喊㗎！
ความคิดเห็น